اخبار النجوم

الغربال في أخطر حوار .. الريس السوباط قالي ( بنيت بيت كبير وسمح وناقص الكهربا تعال نورو )

الغربال في أخطر حوار .. الريس السوباط قالي ( بنيت بيت كبير وسمح وناقص الكهربا تعال نورو )

 

 

 

كان ذهابه من الهلال مدويا وكان تسجيله للوصيف اکثر دويا والحسرة ظلت باقية في نفوس جماهير الأزرق الدفاق خاصة وقد تالق مع الوصيف وقادة لمراحل متقدمة في البطولات الإفريقية والعربية باهدافه الحاسمة ورات جماهير الهلال بعينها وتحسرت وهي تقرا من كتاب الوصيف مابغيظهم وبكل امانة فقد كنت واحدا من هؤلاء المفجوعين بذهابه وقد شكلت عودته للهلال في التسجيلات الأخيرة فرحة طاغية وكانت خير ختام وكللها المبدع الغربال وميدو وجكسا وكثرة المسميات شل على عظمة حاملها وتفرده وقد جملها بهدفه البديع الذي اسعد كل جماهير الرياضة قاطبة عنا فئة قليلة من الأهلة كانوا السبب في شطبه ومغادرته لمرتع طفولته وصباه واخرين تعرفونهم من سيماهم الحمراء والصفراء الذين فتلنهم كثرة الولولة مند قدوم لجنة التطبيع – ولذلك فقد سعیت إليه امس وهو في طريق مغادرته لمعسكر الهلال في حوار الساعتين الذي كشف فيه الكثير من الأسرار والخفايا التي تنشر لأول مرة وقد خصصنا الجزء الثالث اليوم والأخير لأسرار عودتة لبيته الهلال فإلى مضابط الجزء الثالث والأخير
العودة للبيت الكبير

 

 

جاتني دعوة قبل شهرين من المريخي النور جعفر في كرنفال تحدي الأربعاء باتحاد المحس وهو تحدي لطيف وقد شارك الأستاذ الرشید علي عمر في ذالك اليوم وكان يداعبني داخل الملعب با زجاجي مابتغلبنا وكانت مداعبة لطيفة منه وكنا نضحك داخل الملعب وبعد نهاية المباراة أخذني على جانب وقال لي ياكابتن رايك نفاوض ترجع للهلال من جديد بعد ان تغيرت الإدارة وجات لجنة تطبيع من ناس غير خالص قلت ليه بيتي وماعندي مانع بس عندي مشاكل مع فريقي الجزائري وساعي للحل قالي انا بدي رقمك الطاهر یونس بكلمك وكل واحد مننا مشى في طريقه وعاوز أقول يا استاذ اني بالجد كنت بعني الكلمة القلتها ليهو بيتي لانو انا اتربيت في الهلال من وانا صغير ورغم ماقدمه لي المريخ وجماهيره والريس جمال الوالي لكن الحنين مکان بغلبني للهلال وماكنت مفتكر الموضوع حامشي لانو فعلا كانت عندي مشاكل مع النادي وكان مفروض بعيروني للمولودية الجزائري لانو اهلي بوعريج مرت بيه ظروف وستة شهور مادفع لي المرتبات وكنت بمر بظروف صعبة ولولا وقفة رابطة المريخ بقطر ماكنت عارف أعمل شنو لكن كنت حريص على المشاركة مع المنتخب ودي الحاجه الوحيدة الكانت بترفع معنوياتي
تاني يوم طوالي إتصل بي المهندس الطاهر يونس وشرحت ليهو الحاصل كله وان انا ماعندي مانع بس مشكلة فريقي الجزائري وطلب مني ننلاقي وفعلا بعد كم يوم اتلاقينا ولسة التسجيلات كانت بعيدة والممتاز شغال لسه وكان تركيزي كلو على حل مشكلتي في الجزائر لانو ماكان ممكن اتفاوض وانا ماجاهز لكن المهندس الطاهر يونس بذل معاي مجهودات كبيرة وطلبوا في الاول من بوعریج انو أجي إعاره لكن إتفقوا الانو طلباتهم المالية كانت كتيرة والفترة دي كانت زي أسبوعين عشت فيها احباط شديد لانو موضوع اعارة المولودية مانجح وهسه والحاجه الوحيدة الكانت مفرحة كان اللقاء مع الريس السوباط بعد اتصال من أستاذ الرشید ومشينا انا وهو ومعانا المهندس الطاهر بونس ورفع الريس روحي المعنوية وهو يقول لي ( انا بنيت عمارة جميلة وناقصه الكهربا ) كما أنه وعدني بمبلغ کويس كحافز تسجيل وانو دي رغبته ورغبة اللجنة وكل جماهير الهلال. هلالاب أسياد وطن.
موضجوع فسخ العقد كان في تواصل بين الريس الطاهر والمحامي التونسي وهو قال للطاهر فعلا ده أفضل حل وبعدها انا سافرت مع المنتخب رحلة أديس للتحضير لمباراة غانا وفي المعسكر جانني البشارة من المحامي أنورفع الشكوي وطلب الفسخ

 

 

للفيفاواول ماسمعت بالكلام ده اتصلت باستاذ الرشيد والرئيس الطاهر يونس وكانت في البداية الفعلية لعودتي للهلال وكانت التسجيلات بدت خلاص والهلال سجل لاعبين كويسين وتقربنا بشكل في فريق جديد لكن كان واضح انهم ماشين برؤية فنية واضحة في الخانات والمال كان متوفر وجاني امل كبير إنو الظروف بقت مهياة لعودتي لبيتي الهلال وتبقت لمسات خفيفة لأعمال الصفقة والشي الكان مريحني انو المهندس الطاهر قال لي الريس شخصيا مشرف علي صفقتك تحديدا ومابختلف معاك نهائي في التفاصيل المالية ودي انا ماكنت خايف منها وفي الوقت ده بدات اتصالات من بعض ناس المريخ لانو اخبار مفاوضات الهلال بدت تنتشر في الميديا بس كانت خجولة كده ههههههه عاوزني آآكدها يعني ولاشنو شايفكم كتبتوها في الجرايد انا اعتبرتها عرض من المريخ وطبعا ماكان ممكن أوافق على خمسين الف دولار كعرض لمدة عام وواضح انو عرض ماجاد وهم ماممكن يقولوا لي شيلها وماتلعب للهلال عديل كده لانو كلام مامنطقي ومامقبول لانو انا لاعب كورة وعاوز العب وامتع الجماهير وامتع نفسي بهوايتي البحبها لكن انتو قولوا زي ماعاوزين لانو دي حساسيات بين الفريقين وبرضوا انا بعتبروا عرض غیر جاد
أطول ليلة كانت الأخبار الجات من الجزائر انو الفيفا فسخت العقد وده كان كلام المحامي وكنت وصلت لشبه اتفاق مع الهلال على قيمة الصفقة وبعد التمرين بناع المنتخب جاني المهندس الطاهر بونس ومشينا ” غرفة تسجيلات الهلال وكانت ليلة طويلة جدا كان فيها شد وجذب طبيعي لغاية ماوصلنا للإتفاق بشكله النهائي وكان الريس السوباط متابع معانا بالتلفون وكان حريص جدا على إكمال الصفقة وأطول ساعات في حياتي كانت قبل فقل السیستم ووقعنا العقد وكنا جاهزين ومنتظرين من الإتحاد الجزائري عشان تكتمل المعلومات وكان متابع معاهم المحامي في الجزائر وكانت اسعد لحظة بعد الساعات الطويلة من الإنتظار فكانت العودة للديار أخيرا وبشکر جمهور الهلال علی فرحته الكبيرة وصراحة يا استاذ لاعبين الهلال حسب ماوصلني من المهندس الطاهر كانوا راغبين في عودتي ووصلوا لي رسالة واضحة كان أثرها کبیر هههههه تلفوني کان مقفول وناس الطاهر شالوا مني ماعارف الاتصال منو وانا سمعت زي زيكم بعد نهاية التسجيلات ونقل السيستم بس لما فتحت تلفون لقيت تلفونين من بره السودان واحدمن الامارات وواحد من السعودية مابعرف اصحابهم منو ومارجعوا تاني هههه . شكرا الغربال على سعة صدرك شكرا ليكم على هذا اللقاء وشكرا لجماهير الهلال وللريس ونائبه على ثقتهم وأتمنى أن أقدم للهلال بيتي مايرضي جماهيره وان أعوضهم عن الفترة السابقةودعواتكم معای .

مقالات ذات صلة

إغلاق