خالد عز الدين يكتب ثقالات الجمعة .. يا الله نسيت احمد بيتر !!

ثقالات الجمعة .. يا الله نسيت احمد بيتر !!
عندي هوس بتاع تاريخ اليومين دي .. هو السبب الرئيسي الخلاني ارجع للكتابة .. قلت أكتب لي خمسة مقالات كده عن نشأة المريخ عشان ندي فرصة كمان للناس الاجانب والمجنسين البدخلوا في الانترنت يشيلوا معلومات أضافية عن نادي المريخ لاني لاحظت انو المعلومات كلها مصدرها واحد والمعلومات واحدة .. يكتبوا ليك المريخ تأسس تحت أسم المسالمة في عام 1908 ومرات بنقصوها سنة بعملوها 1907 .. قلنا المريخ طريقوا سالك من جيبوتي لطرابلس واحتمال يصل دوري المجموعات وبعدين يجونا المعلقين الثقيليين بتاعين بي ان سبورتس ديل يشبكونا المريخ نادي قديم تأسس تحت اسم المسالمة عام 1908 .. طبعا عمك (قوقل) بقدر ما قدم فوائد كثيرة بقدر ما عندو مشاكل برضو .. يعني بوثق لمعلومات غلط صعب تاني تصلحها .. لكن اهو قلنا نجتهد لو واحد اجنبي ولا مجنس عايز يعرف معلومات عن المريخ نوريهو برضو ان قصة المسالمة دي كضبة كبيرة وانو المريخ ما امتداد للمسالمة .. ممكن يكون امتداد بيت المال حسب رواية المريخابي الاستاذ الكبير كمال طه الذي قال ان اسم المريخ الاول هو (الضواحي) نحن برضو حبينا نشارك ونضع في عالم الانترنت حقائق للباحثين ممكن يقارنو ويعرفوا انو المسالمة ده تيم صغير لحي صغير يسكنه الكثير من (المسالمين) المجنسين ومن اوائل الاحياء التي مارست كرة القدم في السودان ولكن لا علاقة له بالمريخ الا من خلال شاب من شباب الحي اسمه عبد السيد المسيح فرح ابوسيفين كان يلعب في المسالمة ولشئ في نفس (يعقوب) اختار ان ينشئ تيم صغير اخر بعيدا عن أسم المسالمة !! وطبعا أسس المريخ وبعدين حكاية المريخ دي زاتا ما اقتنع بيها كتير قام جلس مع جماعة تيم فيكتوريا وقال ليهم نحن عايزين نعمل معاكم شراكة .. ناس الملكة فكتوريا قالو لي نحن عندنا شروط ودي برضو حسب رواية المؤرخ المريخي الكبير الاستاذ ابوبكر عابدين .. طبعا ناس الملكة فكتوريا ديل ناس شايلين اسم ملكة كبيرة والمريخ ده تيم صغير ما قادر يحمي نفسوا عايز يغير اسمو .. المهم ناس ابوسيفين ديل قبلوا بالشروط وعملوا شراكة تحت اسم فريق الاهلي ولكن
الشراكة ما استمرت كتير زي شراكة قحت والعساكر كده .. ورجاء مافي زول يسألني نتائج الشراكة بين العسكر وقحت شنو.. ولا نتائج شراكة فكتوريا والمريخ شنو !! مافي اي زول مريخابي كتب لينا عن مباريات الاهلي في عام 1933 غلب منو واتغلب من منو لكن ما غريبة نحن زاتنا ما عارفين لي هسة قحت غلبت ولا غلبوا العساكر ؟!! تصدقوا مافي زول عارف سيدة فرح الاختارت اسم المريخ كان موقفها شنو لما اخوها اختار الاهلي وساب المريخ !!!
المهم شاركنا بشوية معلومات في الانترنت هسة لو كتبت المريخ والمسالمة مع كلام ابوبكر عابدين برضو بظهر ليك كلام خالد عزالدين .. ابوبكر يقول المريخ امتداد للمسالمة وخالد يقول ليك ما امتداد !! دي الديمقراطية العايزنها زي ما قال الداعمكم هذه الايام وابو الاستاد !! أيوة الرأي والرأي المخالف.. زمن الغتغتة والدسديس انتهي ! اها وانا بكتب في الاراء دي كتبت ليكم أمس عن الاجانب والمجنسين .. وقلت ليكم المريخ عندو مجنس واحد .. وده طبعا كلام ما صاح فعايز اعتذر عنو واشكر الهلالابي العكليتة (أبراهيم بابوش) الذي اكتشف برضو انو المريخ ما المسالمة والمجنسين ما واحد طلعوا اتنين يا خالد عزالدين .. أنت نسيت احمد بيتر ولا شنو ؟؟ لا حولاااا ..نسيت والله .. أصلا الناس ديل كترت ما مجنسين لو قعدنا نحسب تجنسيهم من النشأة عايزين لينا دفاتر .. ممكن عادي يكون في يوم من الايام اسمهم نادي (المجنسين)
أحمد بيتر ده كمان حكايتو غريبة خلتنا نرجع لثقالات الجمعة .. مرة واحدة كده في السنة .. أعفوا لينا !! واتحملونا .. نحن برضو صبرنا عليكم كتير ..
بيتر ده كان بلعب في بيت المال . لا ما امتداد بيت المال ! كمان انتو ما تكترو الثقالة .. ومن بيت المال جا الهلال .. ناس الهلال عرفوا انو بيتر عندو اكثر من اسم واكتر من جنسية وفي لخبطة في عمروا زاتو !! طوالي قالوا لي انت جيت غلط .. ده نادي اسمو واحد وشعارو واحد وسوداني بالميلاد ما بالتجنس .. في نادي تاني قريب بي جاي حاجاتك دي بتشبهو !!
أحمد بيتر عادي في ظل الفوضي الحاصلة في البلد دي كان بلعب في اندية كثيرة بدون اوراق ثبوتية وانتقل من الضواحي للمسالمة لفكتوريا للاهلي للمريخ !! اهلي مروي عشان ما تفهمونا غلط ..
أها بيتر ده ما معروف كان بلعب بي شنو ؟ رقم وطني ولا اشهاد شرعي ولا بدون !! علي طريقة البدون في الكويت ؟؟! والاغرب من ده كلو بختاروا المنتخب ؟!!! علي اي اساس انا زاتي ما عارف .. زول ما عندو جنسية ولا جواز حيلعب في المنتخب كيف !! والغريبة هو في ناديهو زاتو ما كان بلعب.. أظنو لعب مع المريخ كورة واحدة واشتكوا فيهو ناس هلال الفاشر وطبعا خسروا الشكوي .. ودي ما اول مرة يعملها المريخ قبل كده برضو باسكال واوا موسم كامل لاعب بدون جنسية .. لما الهلال اشتكي عصام الحاج قال ناس الهلال اشتكو في باسكال واوا ونحن لاعبنا اسموا باسكال واووا بي دبل واو .. واو .. ! مش قلت ليكم حكاية المريخ والتجنيس حكاية تحير ..
نرجع لموضوعنا الاصلي لتصحيح المعلومة التي وردت في عمود الامس لاني نسيت المجنس الثاني للمريخ احمد بيتر .. بس السؤال احمد بيتر ده عملوا لي تسجيل جديد باورنيك تسجيل جديد ولا حصل شنو ؟ وفترتو السابقة مع المريخ يحسبوها كيف ؟ دي حتكتبها ازاي يا حسين ؟ طناش كده زي فترة المريخ لما بقي اسمو الاهلي ؟ ندفن الفترة دي برضو ؟ ما احمد بيتر يا لاعب جديد ومفروض يتسجل باورنيك تسجيل جديد أو لاعب قديم مفروض نعرف كان بلعب كيف من غير مستندات ولييه هلال الفاشر ما كسب الشكوي وعلي أي اساس كان سوداني وكيف اصلا تم اختياره للمنتخب وهو ما عندو جنسية !! اما موضوع جنسيتو ده صعب نناقشوا في الوقت الراهن .. البلد جايطة سياسيا والناس ديل زهجانين احسن نبعد منهم !!
أنا زاتي احسن اقيف هنا .. وان شاء نفوز يوم الاحد وكلوا ملحوق ..