خالد عز الدين يكتب بعنوان ضرب في الارتكاز وقلع ضرس !
ضرب في الارتكاز وقلع ضرس !
في ناس ما بتحب صدام حسين لكن معجبين جدا بشجاعتو وصمودو .. وفي ناس ما بحبو جعفر نميري لكن بحبو مواقفو الشجاعة والمتهورة !! واكييد كلنا ما بنحب السرقة والحرامية ولكن في حرامي (شفت) كده تتكيف من الطريقة السرق بيها ! والمؤكد في ناس ضد (القونات) لكن مرات حركات عشا الجبل بتخليهم يطلعوا الجبل !! تفاصيل صغيرة قد تجعلك معجب بشئ انت ترفضه في الفكرة .. يعني ميسي ممكن يلعب باص يحيرك وانت تكون بتشجع ريال مدريد وبتكره ميسي لكن ما عندك سكه الا تعجب بالباص !! وأنا شخصيا ضد الفكرة الاساسية لتسجيل الصيني لكن الضربة عجبتني !! بتاعة معلمين .. فكرة جهنمية وحلوة ومعلوبة وقلع ضرس بدون بنج خلت الجماعة بكورو من سته شهور مع خصم شهرين !! ومازال بيت البكاء مستمر دون تحديد لمواعيد رفع الفراش .. ناس بقولوا فيها كاس وناس بقولوا كمل النقاش والعليقي ما بتكلم .. الكاش بقلل النقاش !! تقيييان والصيني في الميدان ..
في شيبوب قلنا دي اول مرة في تاريخ الناديين لاعب يشيلوه من جوه الكشف .. سمعنا بالصراع حول لاعبين منتقلين من اندية اخري يحدث صراع في تسجيلهم وسمعنا بلاعبين انتهت فترة تسجيلهم في ناديهم ممكن يمشوا النادي التاني لكن لاعب جوه كشفك وانت مطمئن تلقاه مافي بلفة جوبا دي كانت حااااره .. اللعبه دي كانت فيها (كردنه ) شديدة وأجمل مافيها انو الجماعة لحقوا شيبوب وقطعوا ليهو تذكرة ورجعوا للهلال بتذكرتهم بالطيارة ما ببص الوالي !! والذكري تنفع المؤمنين ولفظ المؤمنيين يشمل المسيحيين ايضا !! هذه معلومة دينية جاءت عرضا ارجو انو الناس ما تفسرها غلط او تعتقد اننا رجعنا للجذور .. أبدا نحن عايزين نذكركم عملية من جوة الكشف قبل ان نحكي ليكم عن عملية قلع الضرس ده ..
شيبوب لاعب هاوي ضربتو بتاعة محترفين لكن اكيد الهلال المتطور اداريا انتقل من الهواة الي المحترفين .. المرة دي لاعب متعاقد عديل كده .. محمي بالقانون برضو شالوا من جوه الكشف .. فسخ وخلج !! لما تكون (الصيني) الياباني بضربك .. جوده عالية ياخي ..
نادي أسهل حاجة تشيل لعيبتو .. نادي فاركو ساكت .. ياخي فاركو شايل منو مهاجم لما المحكمة قررت ليهم الغرامة لقوا الغرامة مافي والرئيس الكسب القضية مافي والقروش بالاقساط وما لموا فيها من فاركوا ولدبي بتاركو.. طيران شديد .. الرئيس ورئيس القطاع الرياضي الاتنين ما بجوا السودان والجماعة لسه منتظرنهم يجيبوا ليهم الكاش عشان احتمال دعم الدعم ده يقيف مع التغييرات الكثيرة في السودان دي !! اها ناس تاركوا برضو ناس طيبين دفعوا شوية دولارات وتيري شايل من المريخ بره اكثر من غرامة كاس !! بس ناس الهلال مفتحين فتحوا الباب للجماعة وخلوا اللاعب يطلع بالشباك .. في عقد قديم .. بلوا واشربو مويتو.. عقد جديد والاتحاد شرطوا والغريبة قالوا كل لجان الاتحاد معانا !! ديل ما عارفين المعاهم من الضدهم !! الصيني قال ليهم ندفع ليكم شوية قريشات سودانية والدولار مستقر مافي خسارة كتيرة !! كم شهر كده والجماعة منتظرين الصيني طلع ياباني !!
الهلال بحب يضرب في الارتكاز من زمن ادوارد ووهبة وحمودة وعلاء الدين يوسف .. وهسه البرازيليين ديل لو فيهم لاعب ارتكاز كويس خلوا بالكم منو ما تلقوا لابس فنيلة الهلال في المجموعات .. يلا سلام نلتقيكم في المجموعات بس نعرف اول انتو لاعبين وين ؟!!!
التعليقات مغلقة.