الشاعرة “داليا إلياس” ترد على المتحرشين بها لفظياً (متجوهلة، احترمي سنك،جنك تباري الشفع الصغار)

أفردت الشاعرة “داليا إلياس” منشوراً على صفحتها بفيسبوك، ردت فيه على المتحرشين بها لفظياً من شاكلة (متجوهلة، احترمي سنك،جنك تبارى الشفع الصغار). وقالت إلياس : بستغرب جداً لما ألاقى رسائل وكومنتات على شاكلة: (خفيفة ولفيفة/متجوهلة/إحترمى سنك/ ألزمى مصلايتك/بطلى الرشاقة/جنك تبارى الشفع الصفار/خففى الظهور الكتير/ تيابك شينة/ سمينة/ فاسخة…. الخ)!!! طيب… يا إنسان…. يا منصب نفسك وصى على المجتمع وحارس للفضيلة والدين…. هل هذا التطاول والسخف والتجريح ودخولك فى ما لايعنيك وإنتهاك الخصوصية على الماسنجر، من الإسلام والأخلاق والإنسانية فى شئ؟!! هل حتتحاسب معاى يوم الموقف العظيم؟!!… هل عندك مبرر كافى ولا بيناتنا أى تقاطعات أو سابق معرفة تديك الحق فى مثل هذا؟!! هل عندك فكرة كافية عن تفاصيلى وظروفى؟! وأضافت: أنا زولة الله خلقني كده… إيجابية وعاطفية وعفوية ومحبة للحياة… ومليانة رضا وتسامح وسماح الحمد لله… وعلاقتى بى ربنا وجزيل نعمه على بعرفها انا برااااى وربنا عالم بيها…بحب الناس ومجاملة وإجتماعية… وجواى طفلة ماعايزة تكبر والكلام ده كاتباه ليك قدر رأسك الكبير الفاضى ده !! أها… إنت متوقع مثلاً إنى بعد الكلمتين بتاعنك ديل أعمل شنو؟!!! أتحول لى كائن مريض وكئيب منغلق على ذاته ضعيف الإيمان بالقدر و مشغول بالناس وناسى تصريف الخالق لشؤون الكون؟! والمؤسف فى الأمر أن معظم النوع ده من الرسائل والتعليقات بتكون من سيدات… فى تأكيد واضح لواحدة من قناعاتى المطلقة فى الحياة لكون المرأة عدو المرأة!!! وختمت (غيرة وروح شريرة)، مع تحيات جهولة أم سكاسك.