اخبار النجوم

الأجراس تواجه الغربال في أخطر حوار الجزء الأول تربيت في الهلال وصار جزءً مني ولكن …..

الأجراس تواجه الغربال في أخطر حوار الجزء الأول تربيت في الهلال وصار جزءً مني ولكن .....

 

 

الأجراس تواجه الغربال في أخطر حوار الجزء الأول
تربيت في الهلال وصار جزءً مني ولكن …..
ظلموني وأقحموا أسرتي في مفاوضاتي والأسوأ….
التقرير الطبي مضروووب وأسألوا الأمين العام السابق ودكتور….

حوار محمد الأمين نورالدائم
كان ذهابه من الهلال مدوياً وكان تسجيله للوصيف أكثر دوياً والحسرة ظلت باقية في نفوس جماهير الأزرق الدفّاق خاصة وقد تألّق مع الوصيف وقاده لمراحل متقدمة في البطولات الأفريقية والعربية باهدافه الحاسمة ورأت جماهير الهلال بعينها وتحسرت وهي تقرأ من كتاب الوصيف مايغيظهم وبكل امانة فقد كنت واحداً من هؤلاء المفجوعين بذهابه وقد شكّلت عودته للهلال في التسجيلات الأخيرة فرحة طاغية وكانت خير ختام وكللها المبدع الغربال وميدو وجكسا وكثرة المسميات تدل على عظمة حاملها وتفرده وقد جمّلها بهدفه البديع الذي اسعد كل جماهير الرياضة قاطبة عدا فئة قليلة من الأهلة كانوا السبب في شطبه ومغادرته لمرتع طفولته وصباه وآخرين تعرفونهم من سيماهم الحمراء والصفراء الذين قتلتهم كثرة الولولة منذ قدوم لجنة التطبيع … ولذلك فقد سعيت إليه أمس وهو في طريق مغادرته لمعسكر الهلال في حوار الساعتين الذي كشف فيه الكثير من الأسرار والخفايا التي تنشر لأول مرة وقد خصصنا الحلقة الأولى للجزء المهم الأول وهو مغادرته للهلال فإلى مضابط الحلقة الأولى:-
الهلال بيتي ومرتعي
• ……………….؟
* شكراً استاذ محمد وحباب الأسياد في دار الأسياد الصحيفة وسعيد ان أخاطب الجمهور عبركم وصحيفة الأسياد (يضحك) طبعا كانت مناصرة لرئيس الهلال السابق عندما غادرت الهلال وهنا يضحك ويقول لكن مسامحكم على الزجاجي .
• ……….؟
*عارف إنو الظلمني وكتبها غادر الجريدة واستاذ الرشيد زولي وبعرفوا كوييس ولما نجي للحته بتاعت عودتي للهلال حاأقول دوره شنو في العودة .
• ………؟
* أااه يا أستاذ رجعتني لأيام صعبة والله عشت فيها حالة نفسية عديل كده ان هلالابي وعشت في نادي الهلال وكنت بتمنى اني ما أفارقو نهائي ( تكاد تفر دمعة من عينه هنا ثم أطرق) لكن بس يا أستاذ الحمد لله .. مرت بي ظروف صعبة جداً إصابات متلاحقة وعمليات داخل وخارج السودان ابعدتني عن جمهور الهلال وأصابتني بإحباط شديد وانت عارف انو متعة اللاعب وخاصة المهاجم في وجوده داخل الملعب واحراز الاهداف التي تسعد الجماهير وانا من هنا بعتذر لجمهور الهلال عن الفترة دي وبقول ليهم والله مامني ولو علي كنت اسعدتكم لكن قدر الله وحاجات تانية.
• ………..؟

 

 

*احتراماً لحاجات كتيرة ولانو الادارة الفاتت قدمت الجوهرة الزرقاء حا اختصر ليك الحصل وبصراحة دي اصعب فترة بعد ان تعافيت من الاصابة تماماً وهيأت نفسي للعب بمزاج عالي لتعويض جمهور الهلال عن فترة الغياب والتعافي وخاصة انو ىخر عملية كانت بره السودان وقضيت فترة تأهيل بعزيمة قوية وإصرار شديد على العودة بروح جديدة ولما رجعت ماعارف سوء الحظ ولا حسن الحظ صادف نهاية فترة قيدي وكان لابد من التجديد لي وكان باقي ليها تقريباً شهرين أو أكتر شوية ودي الفترة الأحبطتني لاني لقيت تعامل غريب جداً كانوا مابخطروني بمواعيد التدريب ومابعرف الا بالصدفة من بعض زملائي في الفريق والصحافة كانت محرشه ضدي شديد وكل يوم كلام محبط واشاعات كتيييرة اقسم بالله يا أستاذ لولا اني بحب التحدي كنت خليت لعب كرة القدم .
• …….؟
* ايوه كانت في توصية واضحة للجهاز الفني إنهم يستهدفوني عشان يقنعوا الجمهور اني مانافع ومامفيد وكان في طرق كتيرة عشان يوصلوا رسالتهم من بينها انهم يطلعوني بره التشكيلة الرئيسية واحياناً في الاحتياطي مافي ولما احتج كانوا بدخلوني ويطلعوني وانا راجع من اصابة ومحتاج زمن عشان أتأقلم مع حساسية المباريات وبالجد الخطة كانت مدروسة عشان يضعفوا موقفي في التفاوض عشان يعيدوا قيدي لفترة جديدة .
• …..؟
* بالعكس انا لما رجعت اخر مرة كانت المرة الاولى الاتعافيت فيها نهائياً والتقرير الطبي ده أسألوا عنو دكتور الشاذلي ودكتور عباس والأمين العام وقتها جابوهو من وين ماعارف لانو الخطة كانت واااااضحة عشان قدام الجمهور يكون عندهم عذر لو رفضوا التجديد لي أو عشان اقبل بمبلغ صغير كده ومابتصدق طريقة التفاوض معاي والاشاعة الطلعوها انو ابوي طالب بمبلغ كبير ودي ماحقيقة والموضوع ده قرب يعمل لي مشكلة اسرية يا استاذ وكانت فترة صعبة خلاص والمؤسف انو ناس المريخ كانوا بطاردوني ولما قلت كده لرئيس النادي حلف طلاق وابوي كان قاعد ودي كانت النهاية للتفاوض ودي الفترة بتاعت الزجاجي ( يضحك بشدة )

مقالات ذات صلة

إغلاق